Fondet IPA

Çfarë është IPA?

Bashkimi Evropian në kuadër të financimit të reformave ndaj vendeve kandidate dhe atyre potenciale për të qënë kandidate, realizonte një sërë programesh si: PHARE, PHARE CBC, ISPA, SAPARD, CARDS dhe Instrumenti financiar për Turqinë.

Instrumenti i Asistencës së Para-Aderimit ose siç njihet ndryshe IPA, është instrumenti me anë të të cilit Bashkimi Evropian mbështet reformat e ndërmarra në vendet kandidate dhe potenciale kandidate. Më anë të fondeve IPA, BE-ja bën të mundur rritjen e konvergjencës ekonomike, institucionale dhe sociale të vendeve që aspirojnë anëtarësimin në BE. Instrumenti i Asistencës së Para-Aderimit mbështet zbatimin e reformave në procesin integrues.

Duke filluar nga Janari i vitit 2007 të gjithë programet e mësipërme janë zëvendësuar nga IPA, Instrumenti i Asistencës së Para-Aderimit. Në kuadër të tij IPA 2007-2013 ka financuar:

• Mbështetje për tranzicionin dhe forcimin e institucioneve;
• Bashkëpunimi ndërkufitar;
• Zhvillimi rajonal (transporti, ambienti dhe zhvillimi ekonomik);
• Burimet njerëzore;
• Zhvillimi rural.

Vendet përfituese të IPA ndahen në dy kategori:

• Vendet kandidate për BE-në: Turqia, Shqipëria, Mali i Zi, Serbia, Maqedonia e Veriut (të pranueshme për të 5 degët e IPA-s)
• Vendet potenciale për kandidat të Ballkanit Perëndimor: Bosnje Hercegovina, Kosova (të pranueshme vetëm për dy degë të IPA-s).

Aktualisht, Shqipëria përfiton € 649.4 milion për periudhën 2014-2020 (IPA II) në fushat si: demokracia dhe qeverisja; sundimi i ligjit dhe të drejtat themelore; mjedisi dhe veprimi klimatik; transporti; konkurrenca dhe inovacioni; edukimi, punësimi dhe politikat sociale; agrokultura (bujqësia) dhe zhvillimi rural.

Në kuadër të marrëveshjes IPA, Shqipëria ka ngritur Agjencinë e Auditimit të Programeve të Asistencës, Akredituar nga BE (AAPAA). Ajo është një autoritet auditues autonom, i mbikëqyrur nga Kryeministri. Subjekt i auditimeve të Agjencisë janë të gjitha njësitë e qeverisjes së përgjithshme, individët dhe persona juridikë privatë që përfitojnë fonde të IPA-s dhe/ose të cilëve u kërkohet të kryejnë veprimtari që rrjedhin nga financimi i IPA-s.

Për më tepër informacion se si funksionon AAPAA e gjeni në linkun më poshtë:
http://www.aapaa.gov.al/?lang=al

Për më shumë informacion në lidhje me Fondet IPA për Shqipërinë, ju mund të vizitoni faqen e mëposhtme: https://ec.europa.eu/neighbourhood-enlargement/instruments/funding-by-country/albania_en

Dokumenta

Për më tepër